Көпбейінді онкология және хирургия орталығы

«Медико-Инновационные Технологии» ЖШС (МИТ) ШҚО «Көпбейінді онкология және хирургия орталығын» ШЖҚ КМК-на заманауи Elekta Versa HD электрондық сызықтық үдеткішімен жабдықтау жобасын жүзеге асырды.  

Жоба «Қазақстан халқына» қоғамдық қорының қаржылық қолдауымен Шығыс Қазақстан облысының онкологиялық қызметін дамытуға бағытталған қайырымдылық бағдарламасы аясында іске асырылды.

Жоба шеңберінде МИТ үй-жайларды алдын ала дайындаудан бастап, жабдықты жеткізу және оны пайдалануға беруге дейінгі жұмыстардың толық кешенін қамтамасыз етті. Компания мамандары сәулелік терапия орталығының радиологиялық корпусындағы сызықтық үдеткішке арналған үй-жайларды қайта жабдықтау бойынша құрылыс-монтаж жұмыстарын орындады, сызықтық үдеткішті монтаждап, іске қосу-баптау жұмыстарын жүргізді, сондай-ақ медициналық персоналды жабдықпен жұмыс істеуге оқытты.

Elekta Versa HD — онкологиялық ауруларды жоғары дәлдікпен сәулелік емдеуге арналған заманауи сәулелік терапия жүйесі. Жабдық науқастың жеке ерекшеліктері мен ісіктің орналасуын ескере отырып, сәулелендірудің жоғары дәлдіктегі жоспарларын әзірлеуге мүмкіндік беретін заманауи сәулелік терапия технологияларын қолдайды.

Жеткізу құрамына сәулелік терапия процедураларының дәлдігі мен қайталанғыштығын қамтамасыз ету үшін қажетті PTW дозиметриялық жүйесі және Orfit иммобилизациялық құрылғылары да кірді.